Act 27 | TBG | STEP | Vika uva tiva vate tinavuara Itari vataini vuate ti, vika Poruravata vo karapuhi vaiintinavuvata ntita vare vuru vo iqoka vaiintinavuvano vikaqaa raqikiate ti, Juliusira amura. Juliusiva iqoka vaiinti 100navuqaa raqiki vauvama vaura.

Acts 27

Poruva nora vatuka Romini sipiqi vura

1 Vika uva tiva vate tinavuara Itari vataini vuate ti, vika Poruravata vo karapuhi vaiintinavuvata ntita vare vuru vo iqoka vaiintinavuvano vikaqaa raqikiate ti, Juliusira amura. Juliusiva iqoka vaiinti 100navuqaa raqiki vauvama vaura.

2 Vi vaiintiva karapuhi vaiintinavu ntita varomanta tenavuvata Adaramitihainaakasip iqira vaarire Esiaini virera vuavaunara. Vaiinti vo, Aritaakusiva viva Masedonia vata Tesaronaikaihainaava, vivavata tinavu hampata vura.

3 Vira qararaa vatuka vo Saidonini oru raavauraro Juliusiva Porura quahama amitero tiharo, Maini vaihara homa nena navunaaka oru tavaira vika ai kahaqiha vo airairave karave ai amiate, tuvaro Poruva viva tunte ura. 4 Mintumanta ho viraqaahai tenavu Saidoni mini ke, qaiqaasipiqi vi variavaurarosipivano mini virare tuvaro uvaivano hampi aaraqaahairo uti vauvarora tiro, qaqira kero namari avutaqaa vau vatara vo, Saiparusini hini mantaraini kia uvaivano utunaini vumanta tenavu 5 Sirisia Namari vara mini ke, Pampiria Namarivata vara mini ke oru vi, vatuka vo Mairaini Lisia vataini oruraavaunara.

6 Tenavu Mairaini oruraavauraro karapuhi vaiintiqaa raqiki vauvasipi vo rantakora. Visipiva Arekisantariaihainaasipivano Romini vuare tusipiva vauvaro vira rantakero viraqaahairo viva tinavu tivita varero vuru visipiraqi kora.

7 Visipiraqi komanta tenavu visipiraqi viha uvai kaara qihaa qihaamake vi variavauraro vo entanavu aitaromanta tenavu vukaari utuqi vivi, oru vatuka vo, Nidusi aumanto oruraavaunara. Mini orure avuqavu virare tiavaurarovata, uvaivano kempukaiqumantara ti, qaqirake taurini vi utu vare, Karitini virante vata vitianta, vira autu Salamoneve tiara, vira vara mini ke, 8 viraqaahai vukaari utuqi viha nuqa aukihataa qako qakomaqi vi, Koqe Kantave tianaini oruraavaunara. Mini orure tavaavauraro Lasea vatukavano aumanto vaura.

9 Tenavu airi enta mini variqi vuavauraro Iutaa vatanaaka Kara Auramate Kia No Entava vi entavavata aitarovaro uvaivano noraiqaakero uti vau entava ani rovarora tiro, ekaasipivano qaqirake kia vi anura. Vi entava ani rovaro Poruva himpiro vika tiva nimiro tiharo, 10 Ne maa vaiintika iriate. Tenavu maaqihai vuariraro ˻aaronaavano nora utiharo˼sipi tuqantaa kairarosipiqi vo haika vo haika vate haikava taiqa viraqe tenavuvata taiqa vuarorave. ˻Kaiqenavu kia viraiti, maini variare˼, tiro.

11 Poruva minti tumantasipi vira qovavata, vira varaqiro ni vau vaiintivavata, vitanta tiha, Homa tenavu virarave, tuvaro iqoka vaiintinavuqaa raqiku vaiintiva, vivavata vitanta uvaqai iriharo kia Porura uva iriraitiro tiharo, Homa tenavu virarave, tiro.

12 Vaiinti airitahaavanosipiqi vauka tiha, Nora uvaivano utirera,sipivano kia maini ho varianarove. Kaiqenavu vatuka vo, Finikisini tumutumu qinanaini ho vuarera, mini virarave. Mini oru variariraro uvihairaqe Romi vatukaini vuare, tura.

Finikisinisipivano variainanaini koqe iro vauvaro kia uvaivano uti vaunainiara ti, vika minti turama. Finikisi vatukavano varuva avutaqaa vau vatara Karitini vaura.

Nora aaronaavano utura

13 Vika minti tuvaro vo enta koqe uvaivano utumanta vika homa virare tivake,ankaavanosipi ravaaqavuto haikara vara vaarisipiqi ke, vika kia nora namariqaa viraiti, qaqirake Kariti nuqa aukihataaqai vi vaura.

14 Aukihataa qakomake virare tuvaro, nora uvaivano vata vihairo utiharo 15 sipi vira ventaqiro viharo vataihairo hampi venta komanta tenavusipi tuqantaake avuqavu virare tiavauraro uvaivanoqai kempukaiqama kerosipi venta varero taurini hampi ventaqiro vura.

16 Uvaivano hampi ventaqiro vuvaro tinavu tivita varero vumanta tenavu inaara vata vo, nora namari avutaqaa vau vatara Kaudaini oruraavauraro vi vatava antua kovarosipivano tumutumu qinaini oru vaura. Tenavu tumutumu qinaini orure mini vaiha tenavu vukaari utihama inaara votuvano vekaini vaura 17 vira ravuku vare vaarisipiqi ke, viraqaahai naaqunta varake viraqohai norasipi viraqaa quru qurumake rumpatora. Mintumantasipiqaa raqikuka tiha,Sipivano hampi viharo Afirikaini namari aqaini vuantorave ti, vikaseri quru qurumake vuruvi rumpatovarosipivano qakomakero vi vaura.

18 Mintuvaro uvaivano noraiqama kero qaqiqai utiharo namari vente vauvaro vira qararaa tavovaro airi maaravanosipiqi vaivasipi ravaaqavu kairarosipivano kupeqa vuantorave tihama, vikasipiqi vato airairara varake, namariqi vara vaavi qaqira aqu aqumakeha tavovarovata,sipivano kiaqai hoqamakero vaura. 19 Kia hoqamakero vaumanta vira qararaa taaramo entaqaasipiqiraa airairaserive, kiarive, vo haika vo haikave, vika nái kauquqohai varakeha namariqi qaqira vara vaavi aqu aquma kora.

20 Mintumanta tenavu airi enta viha kia kuarivata opuvata tavaraiti vuavauraro aaronaavanoqai noraiqamakero utuqiro vi vaumanta tenavu tiha, Tinavu kahaqiarirava kia ho vaivo, Tenavu mintumaqi vi vuru taiqama virarave, tiavaunara.

21 Tenavu airi enta mintiaqi viha kia karavata naraiti, variavauraro Poruva vaiinti vika avutaini himpiro tiharo, Ne maa vaiintikao, ne ti uva iriha Kiritini variataarave. Ne ti uva iri mini variatirio, kiama nesipiqi vataa haikava kakakima viraitiro, qaqima vaitirio. 22 Ho te niara kia qetaraiti, kempukaiqamake variate, turo. Kia tinavuqihairo vaiinti vonkuvano kakakima vuanarove.Sipivanoqaima taiqa vuanarove.

23 Kotiva virini vaira te vira vaintivano vaiha te vira autu tuahere vauraukama vauro. Ho entaqi Kotiraenseli vovano ti tivuqaa himpitero vaiharo 24 mintima ti muntu tiva timivo: Poruo, kia qetaane. Are avuhainaa vaiinti Sisaara avuqaa himpitera vainarave. Ho iriane. Kotiva ariarao tiro, viva ai vataakesipiqi variakavata kahaqira ne homa vaivarave tivo. Kotiva mintima ti tiva timivo.

25 Ho maa vaiintikao, virara irihama kia qeteha variate. Kotiva ti tiva timimanta te ni tiva nimunantema kero, Kotiva quqaama ni kahaqianarove. 26 Ho tenavu vuarirarosipivano oruairaani vata voqaata taatau vuanarove, tiro.

27 Poruva minti tuvaro 14 enta aitarovaro uvaivano Mediterenia Varuvavau tinavu qaqi ventaqiro vi vaumanta enta tavaaranasipiqi kaiqa vare vau vaiintika tiha, Vatavano aumantoma varianarove, tura.

28 Minti tivake vika namari avatareka naaqunta varake ori kantarumake namariqi vaavi tuta kovaro otu viro vataqaa otu aravumanta tavovaro vatavano aumanto 40mita vaumanta oru viha qaiqaa avateha tavovaro vatavano 30mita aumanto vaura. 29 Mintumanta vika avatamake tave, qetehama tiha, Tenavu entaqi vaiha voqavata oru vuarirarosipivano oriqaave, vataqaave, viro taatau vuantorave tivake, viraqaahai vikaankaa 4navusipi vekaqaahai kantarumake namariqi tutake tiha, Vaaka kuari vara kairaro itaarire, tura.

30 Sipiqi kaiqa vare vau vaintika tiha, Kaiqenavu tentanavuqai evaara ruqemake vuare, tivake inaara votu vira norasipiqaahai vara vaavi ke, naaquntaqohai vira tuta tutamaqi vi, namarimareqaata/turuqaata kareka auti vaiha unahaa tiha, Tenavu inaara votuqi vaiha norasipi avuni vuruankaa vatarerave, ti.

31 Vika minti tuvaro Poruva vika tavero nora vaiinti viravata, iqoka vaiinti vikavata, tiva nimiro tiharo,Sipiqi kaiqa vare varia vaintika kia maasipiraqaa vaiha raqikivera, nenavu kiama ho vaivarave, tiro.

32 Poruva minti tumanta iqoka vaiintinavu oru inaara votu kantarumato naaquntara teqa aqukovaro inaara votuvano hiqiriro namariqi otu ravara aquvura.

33 Mintuvaro aatitareva uvaro Poruva vika vihi tiharo, Ne kara naate. Ne airi enta 14 enta variqi vihama kia karavata naavo. 34 Virara irihama te ni vihi tiha, Kara naate, turo. Kara naivaro ni vaatavano ho variarire. Kia ni qiata kauhi vonkuvano kakakima vuanarove. Ne ekaa homa maihai qaqi qara vare hiniqaraini oru vaivarave, tiro.

35 Poruva minti tivakero mpareti varakero vika nivuqaa vaiharo Kotirara koqema iarao tivakero kara nero. 36 Poruva mintumanta vika tavovaro vika muntukaqihairovata koqe umanta vikavata kara varake nora.

37 Tenavusipiqi vairera 276 vaiintinavuvano variavaunara. 38 Ho tenavu kara ho nema, viraqaahaisipi maara ntaantorave tima ekaa qaqi vau karara qaqira namariqi vara vaavi aqu kaavaunara.

Sipivano taiqa vura

39 Aatita vumantasipiqi kaiqa varo vaintinavuka vutu vo vata tave, Vi vatara kia tavauna vatarave ti. Vika tavovaro nuqavano auvahianta koqe iro vaumanta minisipi vuru karare ti, 40 viraqaahaiankaa naaqunta teqa aqukeankaanavu namariqi ke, aiqi utu vare vu katarira viraqaa rumpato naaquntaravata teqa aquke, uvaivano ventaqi vuarire ti,seri vo rairake rumpate nuqakanta virare ti, 41 oru vuvarosipivano oru nuqaqaa taatau vura.Sipi aiqivano paama tivakero taatau vuvaro vira vekavano hampi raqikiviro vaiharo raqa vireva auti vaura.

42 Mintumanta iqoka vaintinavu tiha, Karapuhi vaiinti hininavu namariqi nako aruqi vi, hini mantaraini orunte vihai mini ruqemake vinivorave. Kaiqe tenavu karapuhi vaiinti ekaa arukaare, tura.

43 Minti tuvaro vika raqiki vauva Porurara iriharo Poruravata arukevorave tiro, qioqama tero kia karapuhi vaiinti arukaate tiro. Tivakero vikara tiharo, Namari nako aruqi nika, vika naane homa namariqi aquvi nako aruvare vi, qaqini oru ntevarave.

44 Kia namari nako arika ne vihama katarive,sipiqaahainaa haika raqainarave, vira tota varema namarimarevaura/turuvaura vima qaqini oru ntaate, tiro. Vika noravano minti tumanta vika ekaa namari auvahini ho oruntovaro Poruva vaaka uva tiva nimuva quqaa vivauma vaura.